16-02-1986 అవ్యక్త మురళి

16-02-1986         ఓంశాంతి         అవ్యక్త బాప్ దాదా         మధువనము

"గోల్డెన్ జుబ్లీ యొక్క గోల్డెన్ సంకల్పము"

ఈ రోజు భాగ్యవిధాత అయిన తండ్రి నలువైపులా ఉన్న తమ పదమాపదమ్ భాగ్యశాలి పిల్లలను చూస్తున్నారు. పిల్లల ప్రతి ఒక్కరి మస్తకంపై ప్రకాశిస్తున్న భాగ్య సితారను చూసి హర్షిస్తున్నారు. మొత్తం కల్పమంతటిలో ఇంతమంది పిల్లలు, ప్రతి ఒక్కరు భాగ్యవంతులుగా ఉండే తండ్రి ఇంకెవ్వరూ ఉండరు. పిల్లలు నంబరువారీగా భాగ్యవంతులుగా ఉన్నా కూడా, ఈనాటి ప్రపంచంలోని శ్రేష్ఠమైన భాగ్యవంతుల ముందు చివరి నంబరులోని భాగ్యశాలి పిల్లలు కూడా అత్యంత శ్రేష్ఠమైనవారే, కావున అనంతమైన బాప్ దాదాకు పిల్లలందరి భాగ్యం చూసి గర్వంగా ఉంది. "ఓహో నా భాగ్యశాలి పిల్లలు, ఓహో ఒక్క తపనలో నిమగ్నమై ఉండే పిల్లలు!" - అన్న ఈ పాటనే బాప్ దాదా కూడా సదా పాడుతూ ఉంటారు. బాప్ దాదా ఈరోజు విశేషంగా పిల్లలందరి స్నేహము మరియు సాహసము అనే రెండు విశేషతలకు అభినందనలు తెలిపేందుకు వచ్చారు.

ప్రతి ఒక్కరు యథా యోగ్యంగా స్నేహపు రిటర్న్ ను సేవలో చూపించారు. ఒకే తపనతో ఒక్క తండ్రిని ప్రత్యక్షం చేసే సాహసాన్ని ప్రత్యక్ష రూపంలో చూపించారు. తమ తమ కార్యాలను ఉల్లాస-ఉత్సాహాలతో సంపన్నం చేశారు. ఈ సంతోషకరమైన కార్యానికి అభినందనలు బాప్ దాదా తెలియజేస్తున్నారు. దేశ-విదేశాల నుండి సమ్ముఖంలోకి వచ్చినవారికి లేక దూరంగా కూర్చుని ఉన్నా తమ మనసులోని శ్రేష్ఠమైన సంకల్పాల ద్వారా లేక సేవ ద్వారా ఎవరైతే సహయోగులుగా అయ్యారో ఆ పిల్లలందరికీ బాప్ దాదా సదా సఫలతా భవ, సదా ప్రతి కార్యంలో సంపన్న భవ, సదా ప్రత్యక్ష ప్రమాణ భవ అనే వరదానాలను ఇస్తున్నారు. అందరి స్వ పరివర్తన యొక్క, సేవలో ఇంకా ముందుకు వెళ్ళాలనే శుభమైన ఉల్లాస-ఉత్సాహాల యొక్క ప్రతిజ్ఞలను బాప్ దాదా విన్నారు. బాప్ దాదా వద్ద మీ సాకార ప్రపంచము కంటే అతీతమైన శక్తిశాలి టి.వి ఉందని వినిపించారు కదా! మీరు కేవలం శారీరిక కర్మలనే చూడగలరు. కాని బాప్ దాదా మనసులోని సంకల్పాలను కూడా చూడగలరు. ప్రతి ఒక్కరు ఏ పాత్రలనైతే అభినయించారో అవన్నీ సంకల్పాల సహితంగా, మానసిక గతి-విధులు మరియు శారీరిక గతి-విధులు రెండిటిని చూశారు మరియు విన్నారు. ఏం చూసి ఉండవచ్చు? ఈ రోజైతే అభినందనలు తెలిపేందుకు వచ్చారు కావున ఇతర విషయాలను ఈ రోజు వినిపించరు. బాప్ దాదా మరియు సేవలో మీ సేవా సహచరులైన పిల్లలందరు ఒక విషయంలో చాలా సంతోషంతో చప్పట్లు కొట్టారు, చేతి చప్పట్లు కాదు, సంతోషమనే చప్పట్లు కొట్టారు, మొత్తం సంగఠనలో సేవ ద్వారా ఇప్పుడిప్పుడే తండ్రిని ప్రత్యక్షం చేయాలి, ఇప్పుడిప్పుడే విశ్వంలో శబ్దం వ్యాపించాలి..... అన్న ఒకే ఉల్లాస ఉత్సాహాల సంకల్పము అందరిలో ఒకే విధంగా ఉన్నాయి. ఉపన్యసించేవారు గాని, వినేవారు గాని, ఏదైనా స్థూల కార్యము చేసేవారు గాని, అందరిలో ఈ సంకల్పము సంతోషకరమైన రూపంలో బాగా ఉంది కావున నలువైపులా సంతోషాల మెరుపు, తండ్రిని ప్రత్యక్షం చేయాలనే ఉత్సాహము, వాతావరణాన్ని సంతోషాల అలలోకి తెచ్చేదిగా ఉంది. మెజారిటీ సంతోషము మరియు నిస్వార్థ స్నేహాల అనుభవమనే ప్రసాదాన్ని తీసుకువెళ్ళారు కావున బాప్ దాదా కూడా పిల్లల సంతోషానికి సంతోషిస్తున్నారు. అర్థమయిందా.

గోల్డెన్ జుబ్లీని కూడా జరుపుకున్నారు కదా! ఇప్పుడిక ఏం జరుపుకుంటారు? డైమండ్ జూబ్లీ ఇక్కడే జరుపుకుంటారా లేక మీ రాజ్యంలో జరుపుకుంటారా? గోల్డెన్ జుబ్లీ ఎందుకు జరుపుకున్నారు? గోల్డెన్ ప్రపంచాన్ని తీసుకొచ్చేందుకు జరుపుకున్నారు కదా. ఈ గోల్డెన్ జుబ్లీ ద్వారా ఏ శ్రేష్ఠమైన గోల్డెన్ సంకల్పము చేశారు? ఇతరులకైతే గోల్డెన్ సంకల్పాలు చాలా వినిపించారు. మంచి మంచివి వినిపించారు. కాని మీ కోసం ఎటువంటి విశేషమైన స్వర్ణిమ సంకల్పము చేశారు? దాని ద్వారా పూర్తి సంవత్సరమంతా ప్రతి సంకల్పము, ప్రతి సమయము గోల్డెన్ గా అవ్వాలి. మనుష్యులైతే కేవలం గోల్డెన్ మార్నింగ్ లేక గోల్డెన్ నైట్ అని అంటారు లేక గోల్డెన్ ఈవినింగ్ అని అంటారు. కాని సర్వ శ్రేష్ఠ ఆత్మలైన మీ ప్రతి సెకండు గోల్డెన్ గా ఉండాలి. గోల్డెన్ సెకండుగా ఉండాలి. కేవలం గోల్డెన్ మార్నింగ్ లేక గోల్డెన్ నైట్ కాదు. ప్రతి సమయం మీ రెండు నయనాలలో గోల్డెన్ ప్రపంచము మరియు గోల్డెన్ లైటుతో నిండిన మధురమైన ఇల్లు ఉండాలి. అది గోల్డెన్ లైటు, అది గోల్డెన్ ప్రపంచము. ఈ విధంగా అనుభవమవ్వాలి. ప్రారంభంలో ఒక చిత్రాన్ని తయారుచేశారు. గుర్తుంది కదా. ఒక కంటిలో ముక్తి, మరొక కంటిలో జీవన్ముక్తి - ఇలా అనుభవం చేయించడమే గోల్డెన్ జూబ్లీలోని గోల్డెన్ సంకల్పము. ఇటువంటి సంకల్పాన్ని అందరూ చేశారా లేక కేవలం దృశ్యాలను చూస్తూ-చూస్తూ సంతోషిస్తున్నారా. గోల్డెన్ జూబ్లీ ఈ శ్రేష్ఠమైన కార్యం కోసమే. ఈ కార్యానికి నిమిత్తంగా మీరందరూ కార్యంలో తోడుగా ఉన్నారు. కేవలం సాక్షిగా ఉండి చూసేవారు కాదు, తోడుగా ఉండేవారు. ఇది విశ్వవిద్యాలయం యొక్క గోల్డెన్ జూబ్లీ. ఒక్క రోజు విద్యార్థులే కావచ్చు కానీ వారికి కూడా ఇది గోల్డెన్ జూబ్లీయే. ఇంకా తయారై ఉన్న జూబ్లీ సమయానికి చేరుకున్నారు. తయారుచేసే శ్రమ వీరు చేశారు, జరుపుకునే సమయానికి మీరందరూ చేరుకున్నారు. కనుక అందరికీ బాప్ దాదా గోల్డెన్ జూబ్లీ అభినందనలు తెలియజేస్తున్నారు. అందరూ ఇలా భావిస్తున్నారు కదా! కేవలం చూసేవారైతే కాదు కదా! తయారయ్యేవారా లేక చూసేవారా! చూడటమైతే ప్రపంచంలో చాలా చూశారు కాని ఇక్కడ చూడడం అనగా అలా తయారవ్వడం. వినడం అనగా అలా తయారవ్వడం. కనుక ఏ సంకల్పం చేశారు? ప్రతి సెకండు గోల్డెన్ గా ఉండాలి, ప్రతి సంకల్పం గోల్డెన్ గా ఉండాలి. సదా ప్రతి ఆత్మ పట్ల స్నేహంతో కూడిన, సంతోషంతో కూడిన స్వర్ణిమ పుష్ప వర్షాన్ని కురిపిస్తూ ఉండండి. వారు శత్రువులైనా కాని స్నేహపు వర్షము శత్రువును కూడా స్నేహితునిగా చేసేస్తుంది. ఎవరైనా మీకు గౌరవం ఇచ్చినా, ఇవ్వకపోయినా లేక అంగీకరించినా, అంగీకరించకపోయినా మీరు సదా స్వమానంలో ఉంటూ ఇతరులకు స్నేహపు దృష్టి ద్వారా, స్నేహపు వృత్తి ద్వారా ఆత్మిక గౌరవాన్ని ఇస్తూ ముందుకు వెళ్ళండి. వారు మిమ్మల్ని అంగీకరించినా, అంగీకరించకపోయినా కానీ మీరు వారిని మధురమైన సోదరీ-సోదరులుగా భావిస్తూ నడవండి. వారు అంగీకరించకపోయినా మీరైతే అలా భావించవచ్చు కదా. వారు రాళ్ళు విసిరినా మీరు రత్నాలనివ్వండి. మీరు కూడా రాళ్ళు విసరకండి ఎందుకంటే మీరు రత్నాకరుడైన తండ్రి పిల్లలు. రత్నాల గనికి యజమానులు, మల్టీ-మల్టీ-మల్టీ మిలియనేర్లు. వారిస్తే నేను ఇస్తానని అనుకునేందుకు మీరు బికారులు కాదు. అది బికారుల సంస్కారము. దాత పిల్లలు ఎప్పుడూ తీసుకునేందుకు చేతిని చాపరు. వీరు చేస్తే నేను చేస్తాను, వీరు స్నేహమిస్తే నేను ఇస్తానని బుద్ధి ద్వారానైనా సంకల్పం చేయడం, వీరు గౌరవిస్తే నేను గౌరవిస్తానని భావించడం కూడా చేతిని చాపడమే. ఇది కూడా రాయల్ బికారితనమే. ఇందులో నిష్కామ యోగులుగా అవ్వండి, అప్పుడే గోల్డెన్ ప్రపంచము యొక్క సంతోషపు అల విశ్వము వరకు చేరుకుంటుంది. ఏ విధంగా అయితే విజ్ఞాన శక్తి పూర్తి విశ్వమంతటిని సమాప్తం చేసేందుకు చాలా శక్తివంతమైన సామాగ్రిని, కొంత సమయంలోనే కార్యమంతా సమాప్తమైపోయే విధంగా తయారు చేసిందో, విజ్ఞానశక్తి ఇటువంటి రిఫైన్ వస్తువులను తయారు చేస్తుందో, అలా జ్ఞానశక్తి కలిగిన మీరు కూడా ఎటువంటి శక్తిశాలి వృత్తి మరియు వాయుమండలాన్ని తయారు చేయాలంటే కొంత సమయంలోనే నలువైపులా సంతోషపు అలలు, సృష్టి యొక్క శ్రేష్ఠమైన భవిష్యత్తును సూచించే అలలు చాలా త్వర-త్వరగా వ్యాపించాలి. సగం ప్రపంచమైతే ఇప్పటికే సగం మరణించి ఉంది. భయమనే మృత్యువు శయ్యపై నిదురించి ఉన్నారు. దానికి సంతోషపు అల అనే ఆక్సిజన్ ఇవ్వండి. గోల్డెన్ జుబ్లీ యొక్క ఈ గోల్డెన్ సంకల్పమే సదా ఇమర్జ్ రూపంలో ఉండాలి. ఏం చేయాలో అర్థమయిందా! ఇప్పుడు గతిని ఇంకా తీవ్రంగా చేయాలి. ఇప్పటివరకు ఏం చేశారో అది కూడా చాలా బాగా చేశారు. ఇప్పుడిక ఇంతకంటే బాగా చేస్తూ ముందుకు వెళ్ళండి. అచ్ఛా.

డబల్ విదేశీయులకు చాలా ఉత్సాహముంది. ఇప్పుడిది డబల్ విదేశీయుల ఛాన్స్. చాలా మంది చేరుకున్నారు కూడా. అర్థమయిందా! ఇప్పుడు అందరికీ సంతోషమనే టోలీని తినిపించండి. దిల్ ఖుష్ మిఠాయి ఉంటుంది కదా! కావున దిల్ ఖుష్ మిఠాయిని బాగా పంచండి. అచ్ఛా. సేవాధారులు కూడా సంతోషంగా నాట్యం చేస్తున్నారు కదా! నాట్యం చేయడం ద్వారా అలసట సమాప్తమైపోతుంది. కావున సేవ చేశారా లేక సంతోషపు నాట్యాన్ని అందరికీ చూపించారా? ఏం చేశారు? నాట్యము చూపించారు కదా! అచ్ఛా!

సర్వ శ్రేష్ఠ భాగ్యవంతులు, విశేష ఆత్మలకు, పత్రి క్షణము, పత్రి సంకల్పము గోల్డెన్ గా చేసుకునే ఆజ్ఞాకారి పిల్లలందరికీ, సదా దాత పిల్లలుగా అయి సర్వుల జోలెను నింపేవారికి, సంపన్నులైన పిల్లలకు, సదా విధాత మరియు వరదాతగా అయి సర్వులకు ముక్తి లేక జీవన్ముక్తిని ప్రాప్తింపజేసే సదా సంపన్నులైన పిల్లలకు బాప్ దాదాల స్వర్ణిమ స్నేహము, స్వర్ణిమ సంతోషమనే పుష్పాల సహితంగా ప్రియస్మృతులు, అభినందనలు మరియు నమస్తే.

పార్టీలతో:- సదా బాబా మరియు వారసత్వం రెండూ గుర్తుంటాయా? తండ్రి స్మృతి స్వతహాగానే వారసత్వపు స్మృతిని కలిగిస్తుంది మరియు వారసత్వం గుర్తుంటే తండ్రి స్మృతి స్వతహాగానే కలుగుతుంది. తండ్రి మరియు వారసత్వం రెండూ కలిసి ఉంటాయి. తండ్రిని వారసత్వం కొరకు స్మృతి చేస్తారు. వారసత్వ ప్రాప్తి లేకపోతే తండ్రిని కూడా ఎందుకు స్మృతి చేయాలి. కావున తండ్రి మరియు వారసత్వాల స్మృతియే ఎల్లప్పుడూ నిండుగా చేస్తుంది. ఖజానాలతో నిండుగా, దుఃఖము, బాధల నుండి దూరంగా చేస్తుంది. ఈ రెండు లాభాలు ఉన్నాయి. దుఃఖాల నుండి దూరమవుతారు, ఖజానాలతో నిండుగా అయిపోతారు. ఇటువంటి సదాకాల ప్రాప్తిని తండ్రి తప్ప ఇంకెవ్వరు చేయించలేరు. ఈ స్మృతియే సదా సంతుష్టంగా, సంపన్నంగా చేస్తుంది. ఎలాగైతే తండ్రి సాగరులో, సదా నిండుగా ఉంటారో, సాగరాన్ని ఎంత ఎండినట్టు చేసినా సాగరం ఎప్పుడూ సమాప్తమవ్వదు, సాగరం సంపన్నంగానే ఉంటుంది, అలా మీరందరూ సదా సంపన్న ఆత్మలే కదా! ఖాళీగా అయినట్లయితే ఎక్కడినుండైనా తీసుకునేందుకు చేతిని చాపవలసి వస్తుంది. కాని నిండుగా ఉన్న ఆత్మలు సదా సంతోషమనే ఊయలలో ఊగుతూ ఉంటారు. సుఖమనే ఊయలలో ఊగుతూ ఉంటారు. మరి మీరు ఇటువంటి శ్రేష్ఠమైన ఆత్మలుగా అయ్యారా? సదా సంపన్నంగా ఉండాల్సిందే. మీకు లభించిన శక్తుల ఖజానాలను ఎంత వరకు కార్యంలో వినియోగించారో పరిశీలించుకోండి.

సదా ధైర్యము మరియు ఉత్సాహాల రెక్కలతో ఎగురుతూ ఉండండి, అంతేకాక ఇతరులను కూడా ఎగిరింపజేస్తూ ఉండండి. ధైర్యముండి, ఉల్లాస ఉత్సాహాలు లేకపోయినా సఫలత ఉండదు. ఉత్సాహముండి ధైర్యము లేకపోయినా సఫలత ఉండదు. రెండూ కలిసి ఉంటేనే ఎగిరేకళ ఉంటుంది. కావున సదా ధైర్యము మరియు ఉల్లాసమనే రెక్కలతో ఎగురుతూ ఉండండి. అచ్ఛా.